第一次做人父母，要湊初生BB真係有好多嘢擔心，幾時餵奶，點樣換片，會唔會敏感…特別係最怕BB半夜喊唔停，搞到成家人都冇覺好瞓。今次我哋邀請到有十年陪月經驗、照顧過近80個初生BB嘅金牌陪月Fiona，分享照顧初生BB嘅心得！初生BB喊背後嘅原因好多，可能係肚餓、太凍，又或者係片片濕咗「UP」住或焗到唔舒服。Fiona會由日常護理細節開始，帶大家了解由沖涼、餵奶、換片、瞓覺習慣嘅小貼士。只要掌握得宜，BB就自然食得好、瞓得好！
BB日常護理 – 餵奶篇
好多新手媽媽最關心嘅其中一環就係餵奶。無論係人奶定樽餵，其實都有好多細節需要留意，否則BB就容易濁奶、扭計，甚至夜晚瞓得唔好。陪月Fiona建議，新手父母要特別注意以下幾點：
奶溫控制：用溫奶器加熱雪櫃儲存嘅人奶，並用測奶溫器檢查，大約37度最適合；超過38.5度會刺激喉嚨，太凍就難入口。
餵奶姿勢：橄欖式、搖籃式或者側卧式都可以，最緊要媽媽自己舒服。配合哺乳枕同腳踏櫈，可以減輕手臂同背部壓力。
奶咀選擇：初生BB嘅奶咀Size要揀最細，避免吸得太快濁親；BB每次飲20–30ml就要停低掃風一次，唔可以一次飲晒。
掃風方法：食完奶先輕拍BB胸口，再抱直坐好，將身體微微向前傾，媽媽用手托住BB下巴，空心掌由片頭打上開始掃風，或者喺肩胛骨中間由下至上掃風。
掃風時間：唔同BB需要嘅時間唔同，有啲甚至要出2–3個風先舒服。掃完之後唔好即刻放返落床，要斜抱10–20分鐘。如果放低後BB頭仔不停郁，好似唔舒服，甚至睡咗一小時後又喊，就可能要再抱起掃風。
BB日常護理 – 換片篇
除餵奶之外，換片係新手爸媽每日做得最多嘅動作之一。初生BB大小便頻密，一日可能要換成十次以上，如果片片太濕冇即時處理，好容易令BB唔舒服扭計，更會引起紅pat pat！
換片小Tips：
清潔方法：換片時要準備好濕紙巾同 pat pat cream；清潔pat pat要由前向後抹，避免細菌感染。
保持乾爽：抹完後要等pat pat完全乾透先搽cream同更換新片，可以減少紅pat pat嘅機會。適時換片：定期留意BB片片情況，如果片片已經濕透、或者有便便，就要即刻更換。唔好等到BB喊先換，保持乾爽先可以減少不適。
如何選擇合適尿片：
Fiona分享有媽媽同佢講過，BB皮膚狀態好難照顧，容易敏感、紅pat pat。Fiona指出如果尿片唔夠柔軟、唔透氣，或吸收力唔好，就好容易令BB幼嫩肌膚出現問題。所以佢都推介過幾個媽咪試 Pampers 天花板尿片「奢寵系列」，爸爸媽媽用過都話正！全因奢寵尿片有以下幾大特色：
觸感柔軟：表層加入咗真蠶絲，令BB皮膚舒服
有彈力腰圍：包得更貼服，就算飲完奶肚仔脹大縮細，都唔怕後漏。
夠透氣：保持乾爽，唔會焗到紅pat pat。
吸收力強：初生BB稀便多，如果都可以快速吸走，避免長時間接觸皮膚，BB自然舒服好多。
Pampers天花板尿片：指本產品是幫寶適品牌内頂配
真蠶絲：指內表層添加真蠶絲
彈力腰圍：彈性後腰圍適用於系列紙尿片S碼-L碼
BB日常護理 – 沖涼篇
好多新手父母第一次幫初生BB沖涼都會特別緊張，驚自己手勢唔啱整親BB，加上有啲BB怕水，次次沖涼都喊足全程，令爸爸媽媽更加手忙腳亂。其實只要掌握水溫、時間同正確抱姿，再加埋啲小技巧，就可以令沖涼變成BB享受同放鬆嘅時刻！
幫初生BB沖涼小貼士：
控制水溫：使用測水溫器，保持水溫36–38度，可以保留BB嘅天然胎脂，避免太熱刺激皮膚或太凍。
揀啱時間：最好安排喺兩餐奶之間，避免BB啱啱飲完奶嘔奶，或者太餓會扭計。
落水手勢：抱BB落水時，家長要托住BB頸部，如果想隱陣啲就可以捉埋BB腋下同手臂。先俾BB腳仔掂水，再慢慢落pat pat、背脊同手仔，最後用毛巾拍拍心口，幫助放鬆。
增加安全感：準備兩條紗巾仔，一條搭喺心口俾BB壓住，好似著衫咁有重量感，另一條就用嚟洗手仔腳仔。如有兩個大人，可以喺落水時捉住BB手仔；如一個人，就俾BB一手捉住毛巾仔，安全感更足。
聲音陪伴：播放白噪音／音樂，或者邊沖邊同BB講嘢，BB會安心好多。
反身技巧：雙手交接時要托住下巴，洗背脊時可以將BB手仔搭喺家長手臂，避免跣走。
改變次序：有啲BB好怕沖涼，可以試吓落水時先將BB反轉沖背脊，再轉身洗前面。
BB日常護理 – 瞓覺篇
Fiona分享其實BB嘅睡眠質素同日常護理、作息規律都有關。只要留意以下細節，令BB瞓得舒舒服服，想佢一覺瞓天光並唔難！
點解BB成日半夜喊？
BB唔識講嘢，只可以用喊嚟表達自己嘅需要。常見原因包括：
- 肚餓
- 手腳凍或太熱
- 光線太強、環境太嘈
- 肚仔仲有風未出
- 缺乏安全感
父母要做嘅第一步係耐心觀察同判斷。有時只係要抱抱、輕拍，甚至聽吓白噪音，BB就會瞓返。
點樣令BB瞓得淰？
- 餵奶量足夠：要按BB嘅月齡同食量調整，臨瞓前餵足夠份量，幫助BB夜晚瞓得好。飲太少嘅話，BB容易半夜肚餓扭計。
- 使用睡袋：比起傳統被仔，睡袋有包裹感，可以增加BB嘅安全感，唔怕瞓瞓吓踢開被仔凍親。
- 留意BB嘅「眼瞓訊號」：例如捽眼、打喊露，就要盡快安排BB入睡，避免令BB太興奮。
- 日夜分明：作息規律同樣重要。日頭可以拉開窗簾，保持光線明亮，夜晚保持昏暗，留少少夜燈就夠，幫助BB建立生理時鐘，慢慢分辨日夜。
- 聲音控制：日常生活聲音唔需要刻意壓低，例如講嘢、播放音樂都可以，但要避免突如其來嘅巨響，否則容易嚇醒BB，影響睡眠質素。
- 避免日頭長時間抱：日頭盡量唔好長時間抱住BB瞓覺，瞓著後應該放返落床仔，幫助佢慢慢學習自主入睡，對日後戒夜奶都有幫助。
