親子沖繩自駕遊懶人包#1 - 入境要求、租車、airbnb篇

過咗3年終於可以帶小朋友去旅行啦！沖繩一向係親子旅遊嘅熱門地點，但各位爸爸媽媽上網搵資料可能好多都唔update了！今次同大家分享熙熙一家最近去沖繩7日嘅懶人包，包括出入境要求、租車、住宿、親子好去處等等！想知第一手資訊嘅，即刻睇文啦！

我同小朋友11月去咗沖繩7日，想分享返最新親子行程俾大家參考，等大家都快啲執行李去玩！因為我2019年去過，而家好多都執哂了，網上好多資訊都唔update了！同埋我搵到個地方唔係淨係餵海豚，而係可以摸海豚添㗎！我慢慢地打返哂airbnb、行程、map code出嚟，真係希望可以幫到各位媽媽！

疫苗要求
日本10月起放寛入境要求
大人打哂3針，上visitjapanweb上載個人資料（passport、針紙、行程），佢就會gen個qr code俾你，入境日本佢scan完qr code就會直接放行，去辦理入境手續

小朋友呢？
未滿十八歲嘅小朋友，唔需要打針/做檢測，有已打3針嘅成人陪同就可以入境；但都記得必須係visitjapanweb登記上載passport，咁就一家都有qr code；我同爸爸就係以為小朋友唔使登記就咁入境，結果走多咗流程🫠

未打齊3針又點算？
熙熙媽8月中過，所以一直未打第3針，所以需要起飛72小時前去日本許可嘅香港診所做pcr，用口水檢測；指定診所地址可以上網搵，熙媽揀咗九龍區嘅黃埔Kenta clicnic，用whatsapp預約，可揀即日$1200/下一日下午$800拎報告，拎咗報告上載到visitjapanweb就gen到qr code入境

離港/入境
同以前一樣離港無嘜特別，就算hkexpress都係T1入，非常方便入lounge食個早餐

入境日本其實有qr code就好快手，因為我地reg漏熙熙所以走多少少流程，11點到都要12點半先離開機場

租車
呢個係一個好重要嘅事，因為疫情好多租車公司都支持唔住，賣哂啲車，所以傳統OTS, Orix, Times, Toyota我都係搵唔到車，得返露營車。但經過沖繩朋友介紹，搵到廣東話公司租車，大家都可以FB搵 Okiblues嘅Benny幫忙，不過佢都話佢勁full，我其實見kkday klook都有得租，但始終駁上駁我懷疑佢都係問大公司拎車，所以無揀

拎車後記得記得check車，拍片影相，touchwood有咩事拎出嚟睇返；另外車公司俾你時會入滿油，你還俾佢果日都必須入滿油還
入油，日本好多油站，但有啲係自助，通常都係入紅色regular，同埋full，自助就入咗錢先出油，自己搞哂；油費同香港無得比，香港$22 1L日本只係around$7，爽！

Map code很重要！
沖繩自駕遊好多時都需要使用車上嘅導航，而最方便嘅方法就係用map code マップコード，所以建議你計劃行程時，搵好哂map code，到時入落車度，佢就會guide你去目的地；map code比google map好係用日本個系統；但當然都有唔好係我架車有時會去錯地方，有一日誤導咗我地去個國家郊野公園，有少少心寒嘅，最後好彩果度封路，我地決定返轉頭用google map行；同埋架車可能舊，有啲新路佢係出唔到，所以穩陣我會map code+ google map同時對一對路線，如果差唔多就用車導航，會guide得好啲

IC高速
玩法好簡單，上高速先會去一個閘度拎飛，最後憑住你出嘅出口計錢，有時租車公司可以連埋EC card租俾你，咁入閘出閘都好似香港咁直行直過，但其實都唔係差好遠，所以可以唔使租EC card

住宿
熙熙媽去沖繩旅行對住宿有特別要求
(1) 必須望海 (嚟到沖繩唔好浪費)
(2) 有得煮嘢食 (超市買日牛煮好平！熙熙太細係餐廳好難坐定定)
(3) 有露台(方便爸媽me time飲酒睇星)

玩完浦添大公園，我地就出發北上，車程大約1.5小時，如果揸車揸到攰，可以係許田休息站抖抖去廁所，仲可以買手信

許田休息站MAPCODE：206 476 708*78

順帶一提，沖繩有好多公路休息站，有啲仲有公園俾小朋友玩添！

今次呢間airbnb在北部嘅瀨底島，因為之後兩日行程都圍繞「美麗海水族館」、「本部元氣村」、「古宇利島」等，所以住瀨底島都相對方便